Ispinta subra de acumprimentu ispontàneu e controllos anti-frode S'Agèntzia de is Intradas at publicadu sa tzirculare 21/E/2022 chi acrarit is indiritzos operativos in is diversas àreas de faina de su Fiscu: servìtzios, consulèntzia, preventzione, cuntrastu a s'evasione, cuntentziosu.
S'atzione de promotzione de s'acumprimentu ispontàneu, prioritària pro sa reduida de su tax gap, at a èssere intensificada cun sa crèschida de is lìteras de invitu a si pònnere in règula, chi tenent sa funtzione de signalare in bia bonaria possìbiles anomalias e cunsentire a is cuntribuentes de remediare a un' errore o scarescidura a tempus giustu e sena agravet.
Servìtzios prus simpres online “Fàghere evòlvere semper prus in sentidu digitale su modellu de s'assistu”, oferende servìtzios online noos o galu de prus afortigados, in modu de reduire in manera progressiva su bisòngiu de si giùghere acanta is ufìtzios. In custu cuadru s'insertat su nou modellu de acasàgiu de is Intradas: atzessu programadu a s'oràriu cuncordadu e sena coas, mentras est operativu de su mese coladu de freàrgiu su servìtziu nou de videocall, chi cunsentit de dialogare cun un'espertu de s'Agèntzia diretamente de su smartphone pròpiu, tablet o pc. Afortigada fintzas s'assistu telefònicu, pro satisfàghere unu majore nùmeru de impitadores e gestire fintzas is aprofundimentos presos a rechestas bènnidas de unos àteros canales (comente a webmail e Civis) mentras is servìtzios “àgiles”, overas cuddos erogados bia de curreu eletrònicu o pec, postos in campu in s’interis de su perìodu emergentziale, ant a lassare bia bia ispàtziu a servìtzios online e videocall.
Est in fines de su totu operativu s'aplicativu “Cunsignat documentos e rechestas”, chi cunsentit de imbiare documentatzione a is ufìtzios de s'Agèntzia bia internèt, in manera simpre e lestra tràmite unu canale abertu h24. S'atzelerat subra de is rimbursos Tratare a tempus giustu is rechertas de rimbursos e contributos a fundu pèrdidu, pro pònnere licuididade in su tessutu econòmicu e contribuire a s'isvilupu de s'economia de su Paisu, est "un'obietivu istratègicu e unu servìtziu essentziale" pro s'Agèntzia. S'isvilupu de is protzessos de semplificatzione e digitalizatzione at a contribuire a su trincu de is tempos de erogatzione.
Particulare atentzione at a èssere prestada a sa traballadura de is rimbursos rechestos cun sa presentada de su modellu 730, ma fintzas is rimbursos Iva ant a pòdere balangiare in celerità gràtzias a sa possibilidade pro s'Agèntzia de interrogare diretamente is "datos faturat integrados" pro otènnere sa documentatzione netzessària a sa tratatzione de sa pràtica. Cantu a is modalidades operativas, sa traballadura de is rimbursos at a dèvere èssere esecutada cantu prus possìbile cun solutziones furriadas a limitare is mudamentos fìsicos a banda de is cuntribuentes o de is rapresentantes issoro, impreende non petzi sa posta eletrònica, posta tzertificada o racumandada, ma mescamente is canales de collòchiu disponìbiles tràmite is servìtzios telemàticos.
Comunicatziones de reminder e controllos anti-frode Cun s'obietivu de reduire su tax gap, in lìnia cun is indicos cuntènnidos in s'Atu de indiritzu 2022-2024 e in manera coerente cun is previsiones de su Pranu Natzionale de Ripresa e Resilienza (PNRR), s'at a dare ulteriore impulsu, de un'ala, a is comunicatziones pro agiuare s'acumprimentu ispontàneu a banda de is cuntribuentes e, de s'àtera, a is fainas de controllu. In particulare, is comunicatziones ant a èssere suportadas fintzas de noos trastos de data analysis. S'isvilupu de anàlisi de s'arriscu, capatzidade de seletzione e impreu de is bancas de datos at a cunsentire a s'Agèntzia de indiritzare sa faina subra de su cuntrastu de is fenòmenos a prus artziada periculosidade fiscale.
Particulare atentzione at a èssere girada a is frodes, atuadas siat a traessu de s'impreu illegìtimu de is crèditos de imposta chi s'atzessu illegìtimu a is contributos a fundu pèrdidu e a is ristori destinados a is operadores corfidos dae is cunsighèntzias econòmicas de sa pandemia.
B'at a àere in ogni casu ispàtziu a su diàlogu e a is formas de interlocuzione cun su cuntribuente durante totu sas fases de su controllu: in s'acumprimentu de is fainas istrutòrias, is ufìtzios ant a assegurare su ricursu generalizadu a su contradditòriu preventivu, privilegende s'impreu de is trastos a distàntzia e minimende su prus possìbile s'impatu de is fainas pro is cuntribuentes.
-Photoroom.png-Photoroom.png){kind=icon}